Azərbaycanın qastroturizm potensialı Rusiyada təbliğ olunub

Azərbaycanın qastroturizm potensialı Rusiyada təbliğ olunubDövlət Turizm Agentliyi 24 -27 sentyabrda Rusiyanın Moskva şəhərində keçirilmiş "World Food Moscow 2019" beynəlxalq qida sərgisində təmsil olunub.

Qurumdan "Report"a verilən məlumata görə, İqtisadiyyat Nazirliyinin və Azərbaycanda İxracın və İnvestisiyaların Təşviqi Fondunun təşkilatçılığı ilə ölkəmiz bu dəfə də sərginin tərəfdaş ölkəsi qismində "Made in Azerbaijan" vahid milli stendi ilə iştirak edib.

Agentliyin qurduğu stenddə ziyarətçilərə ölkəmizin turizm potensialı və yeni turizm startegiyası ilə bağlı informasiya verilib.

Ziyarətçilər 40-dan çox Azərbaycan şirkəti ilə tanış olmaq imkanı əldə ediblər, 400 kvadratmetrdən böyük olan milli stenddə sərgilənən yerli kənd təsərrüfatı və qida məhsulları ilə tanış olublar.

Ölkəmizin aqroturizm və qastroturizm potensialının əyani nümayişi məqsədilə Agentlik tərəfindən mətbəx qurulub və gündəlik müəyyən edilmiş tematikaya əsasən Azərbaycanın milli mətbəx nümunələrindən ibarət süfrə açılıb.

Ustad dərsləri zamanı Azərbaycan mətbəxinin 21-ci əsrdə dərin etnoqrafik köklərə bağlı qalaraq təkmilləşdirilməsindən, istifadə edilən məhsulların biomüxtəlifliyindən, mətbəx nümunələrinin özlərinin və hazırlanma vasitələrinin UNESKO-nun Qeyri-maddi Mədəni İrs Siyahısında olmasından bəhs edilib.

Dörd gün ərzində sərgi ziyarətçilərinə təqdim olunan katoloq və bannerlərdə Azərbaycan barədə məlumatlar yerləşdirilib və sərginin keçirildiyi zallarda "Azerbaijan: Take Another Look" (Azərbaycan: Bir daha bax) turizm brendinin reklam çarxları nümayiş olunub.


Tarix: 30 sentyabr 2019

Ümumi