Şahdağ Turları

Şahdağ Turları

Şahdağ turları elanları ilə maraqlanırsınızsa, Turlar.az saytına daxil olmağınız məsləhətdir!
Şahdağ Turları qış fəslində ümumi turlar arasında ən çox təşkil olunan turlardan biri sayılır. Şahdağ turizm kompeksi 2012-ci ildən istifadəyə verilib və Azərbaycanın ilk və ən böyük Qış-yay turizm kompleksi hesab olunur.
Qusar rayonu Azərbaycanda turistlərin ən çox gəldiyi yerlərdən biridir, təbii ki, əsasən burada fəaliyyət göstərən "Şahdağ" Dağ-Xizək Yay-Qış İstirahət Kompleksi sayəsində. Qusar turistləri həmçinin təbiət möcüzələri, mədəniyyəti və burada yaşayan insanların adət-ənənələri ilə cəlb edir. Axı Azərbaycanın ən yüksək nöqtəsi - Bazardüzü dağı, ölkədə ən dağlıq turbaza - "Suvar" Dağ-Turizm Bazası və qarşısında eyni zamanda 10 nəfərin oturub xalça toxuduğu ən böyük dəzgah məhz Qusarda yerləşir. Ən nəhayət, ən dadlı qutablar da Qusarda bişirilir.
Qusarı çox vaxt Şahdağın anası adlandırırlar. Bu dağın yamaclarında, dəniz səviyyəsindən 1300 metrdən 2400 metrədək yüksəklikdə yerləşən "Şahdağ" Turizm Mərkəzi haqlı olaraq ölkəmizin ən populyar turizm obyektlərindən biri sayılır. Kompleksin unikallığı sayəsində onun birindən başqa bütün enişləri şimala baxır. Adətən bu yerlər yaza qədər qarla örtülü olur. Dünya standartlarına uyğun, müasir, həm təyinatına, həm də layihə strukturuna görə unikal olan "Şahdağ" kompleksi daim inkişafdadır və hamını təəccübləndirməkdədir. Burada mürəkkəblik dərəcələri müxtəlif olan 14 dağ-xizək enişi, çoxsaylı kanat yolları, beş dəbdəbəli otel fəaliyyət göstərir.
Kompleksdə dərinliyi 2,2 metr olan süni "Snowmaking Reservoir" gölü açılıb. Kompleksin ərazisində tennis kortları, futbol meydanları, əyləncə-oyun kompleksləri də fəaliyyət göstərir. İstirahət edənlər üçün piyada və at belində yürüşlər, alpinistlər kimi dağa dırmaşmaq, kvadrosikllər, dağ velosipedləri sürmək və s. imkanlar mövcuddur.
"Şahdağ" İstirahət Kompleksində fəaliyyət göstərən eyniadlı "Shahdag Hotel&Spa" oteli 1640 metr yüksəklikdə yerləşir, amma həmin yüksəklik bu yerlər üçün son hədd deyil. "Şahdağ" kompleksindən bir qədər aralanan kimi qarşına Azərbaycanın ən yüksək dağ turizm mərkəzi - dəniz səviyyəsindən 1850 metr yüksəklikdə yerləşən "Suvar" istirahət bazası çıxır. Kompleksin kı dağ dərələrində gözəllikdə tayı-bərabəri olmayan gur şəlalələr axır. Ən məşhurları isə 2 min metr yüksəklikdə yerləşən, qoşa şəlalələr deyilən Laza və Şahnabat şəlalələridir. Yerli şəlalələrin bir səciyyəvi xüsusiyyəti var: qışda onlar donur, bununla da buza dırmanma həvəskarlarını və alpinistləri cəlb edir. Odur ki, qış mövsümündə bu yerlərdə buza dırmanma yarışları keçirilir.
"Suvar" Dağ-Turizm Bazasının 2 kilometrliyində, dağlar arasındakı vadidə Laza adlanan qeyri-adi kənd yerləşir. Əslində, Azərbaycanda Laza adını daşıyan iki kənd, yaxud düzünü desək, iki hissədən ibarət bir kənd var. Kəndin ikinci hissəsi dağın o biri yamacında, Dəmirçayın sahilində, Qəbələ rayonu ərazisində yerləşir. Deyilənə görə, Laza kəndinin sakinləri o kənddən köçüb bura gəliblər və yeni kəndə də eyni adı veriblər.
Rayon mərkəzindən 27 kilometr cənub-qərbdə, Qusarçayın sağ sahilində qədim Aniq (Anix, yaxud Enix) kəndi yerləşir. Burada qədim vaxtlardan təmtəraqlı, gözoxşayan evlər tikirlər. Kəndin ortasında yerləşən "Mahalın Tacı" məscidi Hindistandakı Tac-Mahalla oxşarlığına görə bu adı alıb. Deyirlər ki, onun tikintisini Hindistanda olmuş, Tac-Mahalı görmüş və buna görə də öz vətənində bənzərini görmək istəmiş bir adam sifariş verib. Hərçənd iddia edirlər ki, çiy kərpicdən tikilən məscidin 300 yaşı var. Tikili üzərindəki lövhədə qeyd olunub ki, o, XIX əsrdə inşa olunub.
Rayon mərkəzindən 17 kilometr aralıda Xil kəndi yerləşir. 1960-cı illərədək o, Qusarın mərkəzi olub. Lakin indi də bu kəndin öyünməyə haqqı var, axı Xil Azərbaycanın kənd statuslu ən böyük yaşayış məskənidir.