AZAL və turizm agentlikləri turizm və aviasiyanın inkişafını müzakirə ediblər - FOTO

AZAL və turizm agentlikləri turizm və aviasiyanın inkişafını müzakirə ediblər - FOTO
Sentyabrın 29-da "Ritz-Carlton" hotelində "Azərbaycan Hava Yolları" və ölkənin turizm agentliklərinin nümayəndələrini bir araya gətirən səhər yeməyində aviasiya və turizm sektorları üzrə əməkdaşlığın perspektivləri müzakirə olunub.
Bu barədə "Azərbaycan Hava Yolları" QSC məlumat yayıb.
Qeyd edilib ki, sentyabrın 29-da Azərbaycanda Turizm işçilərinin günü qeyd olunur.
Səmimi şəraitdə keçən görüşdə iştirakçılar turizm və aviasiyanın inkişaf potensialını müzakirə ediblər. Azərbaycanın bu sahədə dünya miqyasında mövqeyinin möhkəmləndirilməsi üçün səmərəli qarşılıqlı fəaliyyətin əhəmiyyətinə xüsusi diqqət yetirilib.
Görüşdə geniş miqyaslı məsələlər, o cümlədən marşrut şəbəkəsinin genişləndirilməsi, sərnişinlərə göstərilən xidmətin keyfiyyətinin yüksəldilməsi, maraqlı turizm təkliflərinin yaradılması və bir çox digər aktual məsələlərə baxılıb. Aviaşirkətin nümayəndələri əməkdaşlıq çərçivəsində görülən işlər barədə də ətraflı məlumat veriblər.
"Biz əminik ki, iki sənaye arasında aktiv qarşılıqlı əlaqə turizm sektorunun müxtəlif aspektləri üçün vacibdir. Birgə səylərimiz sərnişinlərə müxtəlif və cəlbedici turizm məhsullar və xidmətlər təklif etməyə imkan verəcək", - deyə bu strateji əməkdaşlığın əhəmiyyətini vurğulayaraq AZAL-ın Satış və Tərəfdaşlıq üzrə direktoru Çingiz Mürsəlov bildirib.
Turizm agentliklərinin nümayəndələri öz növbəsində yeni turizm təklifləri yaratmaq, səyahətləri daha da rahat və maraqlı etmək üçün aviaşirkətlə fəal əməkdaşlığa hazır olduqlarını bildiriblər.
Hər iki tərəf əməkdaşlığın möhkəmləndirilməsində israrlı olduqlarını vurğulayaraq, bu cür görüşlərin davam edəcəyini qeyd edib.
/ oxu.az