Ərəblər Azərbaycana niyə az gəlirlər?
Ərəblər Azərbaycana niyə az gəlirlər?
Bu il Azərbaycana gələn ümumi turistlərin sayı 37 faiz artıb, xüsusilə Avropa ölkələrindən gələnlərin sayında artım müşahidə olunub. Ancaq ərəb ölkələrindən gələnlərin sayında azalma qeydə alınıb. Bu azalmanın səbəbi daha çox ərəblərin müxtəlif turizm destinasiyalarına getməsidir.
Bunu "Trend"ə turizm məsələləri üzrə ekspert Ceyhun Aşırov deyib.
O bildirib ki, pandemiyadan sonrakı dövr üçün hələ də bir çox ölkələrdə məhdudiyyətlər davam edib, xüsusilə ərəb ölkələrindən Avropaya getməkdə müəyyən məhdudiyyətlər olub.
"Bu il biz müşahidə etdik ki, bu məhdudiyyətlər, demək olar ki, tamamilə aradan qaldırılıb və turist axını artıb. Ümumiyyətlə, dünyada turist hərəkətləri daha çox sərbəstləşib. Bu mənada ərəb ölkələrindən olan turistlər digər ölkələrə, xüsusilə Avropa ölkələrinə səfərlər ediblər. Misal üçün, əvvəllər ərəblər üçün 10 turizm məkanı var idisə, indi 20 məkan var. Yəni ərəb turistləri yenə də eyni qaydada səyahət ediblər, amma coğrafi paylaşımda Azərbaycana düşən pay azalıb", - deyə ekspert əlavə edib.
Qeyd edək ki, Dövlət Sərhəd Xidmətinin məlumatına əsasən, 2023-cü ilin yanvar-iyul aylarında Azərbaycan Respublikasına dünyanın 183 ölkəsindən 1 143,6 min və ya əvvəlki ilin müvafiq dövrü ilə müqayisədə 37,4 faiz çox əcnəbi və vətəndaşlığı olmayan şəxs gəlib. Gələnlərin 32,8 faizi Rusiya, 18,2 faizi Türkiyə, 7,4 faizi İran, 4,9 faizi Hindistan, 4,7 faizi Gürcüstan, 3,9 faizi Səudiyyə Ərəbistanı, 2,4 faizi Qazaxıstan, 2,3 faizi Pakistan, 2,1 faizi Birləşmiş Ərəb Əmirlikləri, 1,8 faizi Özbəkistan, hər birindən 1,5 faiz olmaqla İsrail və Ukrayna, 1,4 faizi Belarus, 1,3 faizi Küveyt, hər birindən 1,2 faiz olmaqla Böyük Britaniya və Türkmənistan, 11,4 faizi digər ölkələrin vətəndaşları olub. Gələnlərin 70,5 faizini kişilər, 29,5 faizini qadınlar təşkil edib. / oxu.az
