Dünyanın ən kriminal məkanları
Dünyada elə məkanlar var ki, pis mənada fərqlənirlər. Bu səbəbdən turistlər həmin yerlərdən uzaq gəzirlər. Kim öz həyatını bilə-bilə riskə atar ki? Bu yazıda dünyanın ən təhlükəli 5 məkanından bəhs edəcəyik.
1. Mərkəzi park, San-Pedro-Sula, Honduras. Bu şəhər dünyanın ən təhlükəli şəhəri, "ölüm paytaxtı" adlandırılır. Bu şəhər sanki narkotik alverçiləri arasında olan döyüş meydanıdır. Burada yerləşən binaların əksəriyyətini güllə izləri bəzəyir. Pəncərədən ətrafa boylanmaq, həyətə baxmaq çox təhlükəlidir. Bu şəhərdə atəş səsləri hətta turistik rayonlarda da eşidilir. Mərkəzi parkda gəzmək isə heç kəsə məsləhət görülmür. Çünki burada sıx ağacların olması bir çox cinayətlərin gizli törədilməsinə şərait yaradır.
2. La-Laxa, Akapulko, Meksika. Günəşli Akapulko şəhərində əsas qayda odur ki, sənə yaxınlaşan insanın nə təklif etməsindən asılı olmayaraq, ondan bir bəhanə gətirərək uzaqlaşmaq lazımdır. Sadəcə, "Asta la vista" demək və dərhal gözdən itmək lazımdır. Akapulko şəhərinin La-laxa rayonu, xüsusilə, təhlükəlidir. Belə ki, yerli polislərin dediklərinə görə, burada cinayətkarlıq təkcə narkotik alveri ilə kifayətlənmir. Xüsusilə, son zamanlar cinayətkarlar varlı biznesmenləri oğurlayaraq onları yaxınlarına pul qarşılığında qaytarırlar.
3. Benedito Bentes, Maseyo, Braziliya. Maseyo şəhəri öz otlaqları, çoxsaylı şəkər qamışı plantasiyaları və çox növlü cinayətləri ilə tanınır. Burada hər 100000 nəfərə təxminən 130 ölüm faktı qeydə alınır. Bu şəhərin ən təhlükəli rayonu isə Benedito Bentesdir. Bu əraziyə demək olar ki, polislər və xüsusi mühafizəçilər tərəfindən nəzarət yoxdur.
4. Dyumeyn Strit, Nyu-Orlean, Luiziana ştatı, ABŞ. Dyumeyn Stritin sakinləri söyləyirlər ki, bu rayonda heç vaxt sakitlik olmayıb. Xüsusilə "Katrina" qasırğasının gəlişi ilə bu ərazidə narkotik alverçilərinin, avtomobil oğrularının və s. sahələr üzrə cinayətkarların sayı qat-qat artıb.
5. Denhem Taun, Kinqston, Yamayka. Kinqston şəhərinin qərbində yerləşən Denhem Taun şəhərin ən kriminal rayonlarından hesab olunur. Belə ki, burada hər 100000 nəfərə 50 qətl hadisəsi qeydə alınır. Rayonun əksər hissəsi alçaq, etibarsız və yoxsul yaşayış evlərindən ibarətdir.
