Gəncədə Gəzməli yerlər

Gəncədə gəzməli yerlər çoxdur. Gəncə tarixi şəhər olmaqla yanaşı, həmçinin müasir, dövrün tələblərinə cavab verən məkandır. Turlar.az saytı yolunu Gəncədən salmaq istəsəyənlər üçün virtual səyahət proqramı hazırlayıb. Gəncədə gəzməli yerlər ilə tanış olmaq üçün bu yazını oxumağınız məsləhətdir.

Nizami Məqbərəsi

Nizami Məqbərəsini Gəncə şəhərinin simvolu da hesab etmək olar. Şəhərin girişində, Əhmədli kəndində yerləşən Məqbərənin ilk inşası 13-14-cü əsrlərə aid edilir. Ancaq hazırda Gəncənin şərqində ucalan məqbərə 1947-ci ildə inşa olunub, 1991-ci ildə isə yenilənib. Son illərdə Nizami Məqbərəsi əsaslı şəkildə bərpa olunaraq 35 hektar ərazidə şəhərcik yaradıb.

Qala Qapıları

Tarixdən məlumdur ki, Gəncə qalasının beş qapısı olub. Yeni yaradılan bu abidə şəhərin "Məqbərə qapısı" adlanan qapılarının bərpa olunan variantıdır. Gəncə-Bakı magistral yolunun hər iki tərəfində inşa edilən, ümumi uzunluğu 50 metr, bürclərinin hündürlüyü 22 metr olan qalanın əsas hissəsi beşmərtəbəli, baş sütun hissəsi ilə birlikdə yeddimərtəbəlidir. Qarşıda 75 metr hündürlüyündə dövlət bayrağı ucaldılıb, ətrafında park salınıb.

Xan bağı

Xan bağı, bir başqa adı ilə Sərdar bağı Gəncənin və Azərbaycanın ən gözəl və yaşıl parklarından biridir. Şəhərin mərkəzində yerləşən bağ, 1847-ci ildə çarın Qafqazdakı canişini ("sərdarı") knyaz Mixail Vorontsovun təşəbbüsü ilə salınıb.

Butulka ev

Gəncə mərkəzində diqqətçəkən binalardan biridir. 1960-1964-cü illərdə 50 min şüşədən istifadə edilərək inşa olunub. Gəncəlilərin "butulka ev" adlandırdığı bu mülk də tarixi əsərlər siyahısına daxildir.

Cavadxan küçəsi

Gəncə tarixinin ən görkəmli şəxslərindən biri sayılan Cavad xanın adına salınnış küçə yenidənqurma işləri aparılaraq açıq səma altında zəngin muzeyə çevrilib.

Şah Abbas Məscidi

Gəncəlilərin "Cümə Məscidi" də adlandırdığı Şah Abbas Məscidi 1606-cı ildə Şah Abbasın istəyi ilə inşa olunub. Məscidin memarı isə həmin dövrdə Gəncədə bir çox binanın memarı olan Şeyx Bahəddin Məhəmməd Amildir.

Göygöl və Maralgöl

1139-cu ildə Gəncədə yaşanan zəlzələnin nəticəsində Kəpəz dağının bir hissəsi uçaraq Ağsu çayının qarşısını kəsib. Bu təbiət hadisəsi Azərbaycanın ən gözəl guşələrindən olan Göygöl və Maralgölün yaranmasına səbəb olub.

Heydər Əliyev Park-Kompleksi

2014-cü il yanvarın 21-də istifadəyə verilən Heydər Əliyev parkı Gəncənin ən füsunkar və gözoxşayan məkanlarından biridir. Dünyanın 5 ən böyük parkı arasında bu parkın da adı var. Ərazisi 450 hektar, uzunluğu isə 2 kilometrdir. Burada gəzinti, istirahət üçün bütün imkanlar var. Parkın girişində möhtəşəm "Zəfər tağı" ucaldılıb. Eni 20, uzunluğu 50, hündürlüyü isə 38 metr olan "Zəfər tağı"nın ətrafı seyr etmək üçün 30 metr hündürlüyündə meydançası da var. Meydançaya qalxmaq üçün pilləkənlər və lift quraşdırılıb. Parkda yaradılan süni göl və şəlalə də bu məkana xüsusi görkəm verir.

"Məhsəti Gəncəvi" Mərkəzi

Mərkəzdə şairənin yaradıcılığına həsr olunmuş rəsm qalereyası, tədqiqatçılar üçün oxu zalı, musiqi studiyası, not kitabxanası, muğam, fortepiano şöbələri və iclas zalı var. Oxu zalında Məhsəti Gəncəvinin həyat və yaradıcılığı, ədəbi irsi haqqında kitablar, Azərbaycan, rus və ingilis dillərində elektron formatda şairənin rübailəri, bununla yanaşı Azərbaycanın görkəmli şair və mütəfəkkirləri, Azərbaycan musiqisi və xalçaçılığına aid nəşrlər təqdim olunur.

Gəncə Filarmoniyası

2017-ci ildə açılışı olan Gəncə Filarmoniyasının möhtəşəm və incə memarlığı, yaşıl damları və qızılı bəzəkləri insanı valeh edir. Gəncə Filarmoniyası da bu şəhərə gedən turistlərin mütləq baş çəkdiyi məkanlar sırasındadır.