Ən təhlükəli yerlər
Dünyanın gözəl və cəlbedici ölkələri olduğu kimi, təhlükəli yerləri də var.
Kollec-roud, Ferbanks, Alyaska ştatı, ABŞ.
ABŞ zorlama cinayətlərinin törədilmə sayına görə bir çox ölkələri qabaqlayır. Bu cinayətlərin ən çox törədildiyi 3 şəhərdən biri də Ferbanks şəhəridir. Belə ki, burada hər 100000 nəfərdən 191-i bu cinayətin qurbanı olur.
Nyanqa, Keyptaun, CAR.
Cənubi Afrika Respublikasının rəsmi danışıq dillərindən olan kosa dilində bu rayonu adı "ay" mənasını verir. Nyanqa - Keyptaunun ən köhnə rayonlarından hesab olunur və onun sakinləri əsasən qaradərililərdir. Bura həmçinin Keyptaunun ən kasıb və kriminal ərazilərindən hesab olunur. Təsadüfi deyil ki, Nyanqanı CAR-ın "qətllər paytaxtı" adlandırırlar.
Via-Del-Tritone, Roma, İtaliya.
Romada qətl və oğurluq halları digər böyük şəhərlərə nisbətdə o qədər də çox deyildir. Narkotik ticarəti burada o qədər də inkişaf etməyib, eyni zamanda mafioz qruplaşmaların fəaliyyətləri də İtaliyanın digər regionlarına baxdıqda burada zəifdir. Lakin İtaliya bankların qarət olunmasına görə Avropada liderdir. Belə ki, Avropa Birliyinə daxil olan ölkələrdə bank qarətlərinin statistikasına nəzər saldıqda, İtaliyanın payına bu cinayətlərin 42 %-i düşür. Təkcə Via-Del-Tritone rayonunda onlarla bank yerləşir.
Vera Kruz, Modesto, Kaliforniya ştatı, ABŞ.
Modesto - xüsusilə sürücülər üçün cəhənnəmi andırır. Amerika Milli cinayətkarlıqla mübarizə bürosunda reytinqə görə ən çox yol qəzaları burada baş verir. Ümumiyyətlə, bu şəhərdə şəxsi həyat və mülkiyyət əleyhinə çoxlu cinayətlər baş verir. Son zamanlarda, xüsusilə qrup halında törədilən cinayətlərin sayı artmışdır. Odur ki, təkcə sürücülər üçün yox, eyni zamanda piyadalar və turistlər üçün bura təhlükəli ərazi hesab edilir.
Metropoliten, Dehli, Hindistan.
Amerikalı jurnalistlərin hazırladığı "Risklər xəritəsi"nə əsasən, adam oğurluğu cinayətinin statistikasına görə Hindistan Meksikadan sonra ikinci yeri tutur. Məsələn, 2011-ci ildə 8000 belə faktdan 3000-dən çoxu Dehlidə baş vermişdi. Bu şəhərdə tez-tez qətl və zorlama cinayətlərinə də rast gəlinir. Yerli polis orqanları xəbərdarlıq edir ki, Dehlidə ən təhlükəli ərazilər metrostansiyalardır.