Qusarda Gəzməli yerlər
Azərbaycana gələn turistlərin səfər etdikləri rayonlar sırasında Qusar da var. Bu da əbəs deyil. Çünki Qusarın gəzməli-görməli yerləri kifayət qədərdir. Həm yerli sakinlər, həm də xarici turistlər bu gözəllikləri görməkdən şad olurlar. Turlar.az saytı size Qusarin gezmeli yerleri təqdim edir.
Əniğ kəndi
Əniğ kəndi rayon mərkəzindən 27 kilometr məsafədə, cənub-qərbdə, Qusarçayın sağ sahilində, Qusar-Zindanmuruq yolunun yanında yerləşir. Doqquz kəndi əhatə edən Qusarçay vadisinə də bu kəndin adı verilib. Böyük dağın zirvəsində, təbii maneələrlə qorunan kənddə insanlar ta qədim zamanlardan yaşayıblar. Şahdağın ətəklərində yerləşən bu strateji əhəmiyyətli kənddə ərəb işğalından qorumaq üçün qala inşa edilib. Dəniz səviyyəsindən 1100 metr yüksəklikdə yerləşən, Salavat aşırımının arxasından, Qusarçayım sağ sahilindən boylanan Əniğ qalası (həmçinin Ənih, Eniğ, Anıx) Qusar rayonunun eyniadlı kəndində yerləşir.
Həzrə kəndi
Həzrə Qusar rayonunun tarixi yaşayış məntəqələrindən biridir. Kənd dağlıq əraziyə xas təbiəti, yaşıllıqları və sakit mühiti ilə seçilir. Şəhər səs-küyündən uzaqda vaxt keçirmək, kənd həyatı və bölgənin təbiəti ilə yaxından tanış olmaq istəyənlər Həzrəyə baş çəkə bilərlər.
Həzrə kəndinin tanınmasında yerli adət və ənənələrin də xüsusi yeri var. Kənd xüsusilə pəhləvanları ilə məşhurdur. Burada uzun illərdir qorunub saxlanılan "Sim pəhləvan" ənənəsi mövcuddur. Sim üzərində müxtəlif hərəkətlər nümayiş etdirən pəhləvanların çıxışları milli xalq tamaşalarının maraqlı nümunələrindən hesab olunur. Bu ənənə bayram və el şənliklərində nümayiş etdirilərək nəsildən-nəslə ötürülür. Həzrəyə səfər zamanı kəndin təbiəti ilə yanaşı, Qusar bölgəsinin yerli mədəniyyəti və ənənələri ilə də tanış olmaq olar.
Qusarın Tac Mahalı
Qusarın Əniğ kəndində yerləşən və görünüşünə görə "Tac Mahal" adlandırılan məscid bölgənin maraqlı memarlıq nümunələrindən biridir. İbadətgahın bu adla tanınmasının əsas səbəbi onun memarlığında Hindistandakı məşhur Tac Mahalı xatırladan elementlərin olmasıdır. Əniğ kəndində fərqli memarlıq üslubunda və bəzək elementləri ilə zəngin tikililərin inşası ənənəsi də diqqət çəkir.
Məscidin maraqlı xüsusiyyətlərindən biri divarlarındakı rəsmlər və naxışlardır. Bu təsvirlər uzun müddət keçməsinə baxmayaraq rənglərini qoruyub saxlayıb. Rəsmlərin hazırlanmasında təbii mənşəli, o cümlədən bitki köklərindən əldə edilən boyalardan istifadə edildiyi bildirilir. Divar bəzəkləri məscidin interyerinə fərqli görünüş verir və yerli sənətkarlıq ənənələrini əks etdirir. Memarlıq və dekorativ işləmələri ilə seçilən bu məscid Əniğ kəndində görülə biləcək maraqlı tikililər sırasındadır.
Laza kəndi
Dağların arasındakı dərədə yerləşən kənd iki hissədən ibarətdir. Kəndin ikinci hissəsi dağın o biri yamacında, Qəbələ rayonu ərazisində, Dəmirçayın sahilində yerləşir. Deyirlər ki, kəndin sakinləri məhz oradan köç edərək yeni məskən salıb və bu yeri Laza adlandırıblar.
Laza kəndi Böyük Qafqaz sıra dağlarının, "Şah yaylaq" və Şahdağ zirvəsinin (4242 metr) ətəklərində yerləşir. Dəniz səviyyəsindən 1300 metr hündürlükdə, Böyük Qafqaz sıra dağlarının aşırımlarından keçən karvan yollarının üzərində yerləşən kəndin ətrafı çox mənzərəlidir, qayalardan şəlalələr axıb tökülür.
Kənddə etnik ləzgilər yaşayır. Sakinlər yüksək dağ kəndlərinə xas həyat sürürlər. Hər birinin təsərrüfatı var, quş, iri və xırdabuynuzlu heyvan saxlayırlar.
Laza kəndində ən məşhur tarixi abidə kəndin mərkəzində yerləşən 300 yaşlı məsciddir. Laza Azərbaycanda turistlərin ən çox üz tutduqları kəndlərdən biridir. Yay-qış kənd qonaqla dolu olur. Xüsusilə bura əcnəbilər çox gəlir. Onlar yerli əhalinin xüsusi olaraq öz həyətlərində tikdiyi otaqlarda yaşayır. Kənd 26 evdən ibarətdir. Laza Qusar rayonunun təbiət və tarixi zənginlikləri ilə möhtəşəm bir kəndlərindən biridir. Şahdağ Dağı ilə əhatə olunmuş bu əla yer, qış turizmi üçün ən gözəl seçimlərdən biridir.
"Suvar" Dağ-Turizm Mərkəzi
Bu mənzərəli yer Lazadan iki kilometr aralıda yerləşir. Azərbaycanın ən yüksək dağ turizm mərkəzi qış aylarında da fəaliyyət göstərir. Şahdağın ətəyində, dəniz səviyyəsindən 1850 metr yüksəklikdə salınmış mərkəzin ərazisi hər tərəfdən dağlarla əhatə olunub. Süni göl əraziyə xüsusi yaraşıq verir.
Dağ yürüşlərinə çıxmaq, hündürlüyü 4000 metrdən çox olan zirvələri fəth etmək istəyənlər "Suvar" Dağ-Turizm Mərkəzində çalışanlardan yardım ala bilərlər. Həmçinin dağların ən yaxşı bələdçiləri sayılan və bu yerlərin hər qarışına bələd olan yerli kənd sakinlərinə də müraciət etmək olar. Onlar sizi 3000 metr yüksəklikdəki Şah yaylağa və Şahnabat yaylağına, yaxud 4243 metr hündürlüyə malik Şahdağ zirvəsinə, eləcə də Qızıl-Qaya massivindəki Heydər Əliyev zirvəsinə (3751 metr) çıxara bilərlər. Atla gəzintiyə çıxmaq istəyənlərin Yarudağa ikigünlük səfər etmək imkanı var.
Şahdağ Qış-Yay Turizm Kompleksi
Qışda Azərbaycanın bu ən yüksək nöqtəsinin təbiəti bənzərsiz dərəcədə gözəl olur. Artıq noyabrdan yağmağa başlayan qar mart ayınadək ərimir. Buradakı Şahdağ Qış-Yay Turizm Kompleksində qış idman növləri - xizək və snoubord sürmək, alpinizmlə məşğul olmaq üçün hər cür şərait var. Kompleksin ərazisində hotel, restoran, xizək avadanlığı satışı və kirayəsi, habelə xizək məktəbi fəaliyyət göstərir. Şahdağ Qış-Yay Turizm Kompleksi ilboyu işləyir. Xizək mövsümü burada mart ayına qədər davam edir, yayda isə kompleks dağ istirahəti həvəskarları üçün qapılarını açır.
