Italiyada Gəzməli yerlər
Italiya dünyada turistlərin çox axışdığı ən gözəl ölkələrindən biridir. Ona bəzən Avropanın muzeylər ölkəsi də deyilir. Turlar.az bu yazıda sizə Italiyada ən gəzməli yerlərini təqdim edəcək.
Kolizey
Flavium Amfiteatrı daha çox Kolizey kimi tanınır. O, qədim dünyanın ən nəhəng tarixi abidələrindən, həmçinin Romanın simvolu və yeddi yeni möcüzəsindən biridir. Bu amfiteatr minlərlə qladiatorların qətlinin şahidi olub. Təəssüf ki, o günümüzədək ideal vəziyyətdə qala bilməyib. Bununla belə, Kolizey bugünkü gündə dünyanın dörd yanından gələn turistlərin böyük maraq göstərdikləri məkandır.
Venesiya
Venesiya karnavalı, əlbəttə ki, turistləri çoxsaylı kanallarda gəzdirən qayıqlar, həqiqətən, çox gözəldir. Bu şəhəri görmək üçün tələsməyə dəyər. Məsələ burasındadır ki, proqnozlara görə, 2028-ci ildə Venesiya Şəhərciyi yaşayış üçün yararsız olacaq, 2100-cu ildə isə su altında qalacaq və tamamilə məhv olub gedəcək. Venesiyaya maşınla getmək məsləhət deyil. Çünki orada maşın saxlamaq əsl bəladır. Venesiyada çəkilmiş "Turist" filmindəki qəhrəmanların (Ancelina Coli və Conni Deppin) macəralarını təkrarlaya bilməsəniz də, ən azından çəkilişlərinin aparıldığı dəbdəbəli "Danieli" və "Palazzo Moretta Pisani" otellərini görmək imkanı qazanmış olacaqsınız.
Piza qülləsi
Avropanın görməli yerlərinin 2/3-si məhz İtaliyada yerləşir. Əminliklə demək olar ki, kim İtaliyada olmayıbsa, o, Avropada olmuş sayılmır. Və sizin mütləq Piza qülləsində çəkilmiş orijinal selfiniz olmalıdır. Bu 56 metrlik Piza qülləsi sübut edir ki, səhvlər də uğur gətirə bilər. Axı bu qüllə əyri tikilməsə idi, onda çətin ki, bütün dünyada belə populyar olardı. Bu qüllənin tikintisinə 200 il sərf olunub.
Florensiya
İtaliyanın şimalında yerləşən bu şəhər gələn turistləri özünə elə aşiq edir ki, heç kim vətəninə qayıtmaq istəmir. O, qeyri-adi dərəcədə gözəlliyinə görə, təsviri incəsənət nümayəndələrini ruhlandıran şəhər kimi də tanınır. Təəccüblü deyil ki, Leonardo Da Vinçi, Mikelancelo, Qaliley, Dante və Ameriqo Vespuççi məhz burada doğulub. Onların əsərləri bu gün də Florensiya qalereyalarını və muzeylərinin ziyarətçilərini heyran edir.
Milan
Modapərəst qızlar yaxşı bilir ki, dəb qanunvericilərinin çoxunu Milan yetişdirib. Qızlar Milanı dünyanın dəb və şopinq paytaxtı olduğuna görə sevir. Kişilər isə bu şəhəri iki futbol klublarının - "Milan" və "İnter"in vətəni kimi tanıyır. Məşhur La Skala operası da bu şəhərdə yerləşir. Həmçinin siz burada çox gözəl xram və məbədləri gəzə bilərsiniz.
