Keniyanın ən gəzməli yerləri
Turistik marşrutlar içərisində ən maraqlı kontinentlərdən biri Afrika qitəsidir. Ekzotik təbiəti, zəngin faunası, əsrarəngiz dəniz sahilləri, qeyri-adi mətbəxi, milli etnik tərkibinin müxtəlifliyi ilə Afrika turizmin istənilən istiqaməti ilə maraqlanan insanların istəklərini qarşılaya bilər. Bizə ilk baxışdan elə görünür ki, yer üzündə araşdırılmamış yerlər, demək olar ki, yoxdur. Ancaq Afrika qitəsindən danışanda bunu tam əminliklə demək olmaz. Hələ də tam araşdırılmadığı üçün Afrika sirli və sehrli bir qitədir.
Afrikada 54 müstəqil ölkə olsa da, onlardan yalnız yarısından az hissəsi təhlükəsiz və rahat turizm üçün uyğundur. Davamlı yerli qarşıdurmalar və müharibələr Afrikanın bir çox ölkələrini turizm üçün əlverişsiz edir. Lakin hər il daha çox Afrika ölkəsi öz sərhədlərini turistlərə açır.
Afrikanın mütləq görülməli ölkələrindən biri Keniyadır. Hind okeanı sahilinin kurortları və milli parkların gözəllliyi sayəsində Keniya bütün dünyada Afrikanın simvolu kimi tanınan ölkədir. Afrikada dünya turizmi üçün ən məşhur istiqamətlərdən birinə çevrilən Keniya illərdir bəşəriyyətə isti qucağına gəlməyi təklif edir.
"Masai Mara", "Tsavo", "Aberdare", "Amboseli" kimi təbiət parkları ilə Keniya Afrikanın vizit kartı rolunu oynayır. Bu parklarda siz vəhşi təbiət canlılarının bir çoxunu - şirlər, bəbirlər, kərkədanlar, camışlar, antiloplar, fillər, zürafələr, begemotlar, timsahları görə və bir çox başqa nadir heyvanlarla da rastlaşa bilərsiniz. Masai tayfalarının vətəni olan Keniya gözəldir və turistik cəhətdən inkişaf edib. Keniya dağı Kilimancarodan sonra Afrikadakı ikinci ən yüksək dağdır.
Safari və Afrika bir-birindən ayrılmaz anlayışlardır. Hər il təxminən 200 mindən çox turist Keniyadakı gəzinti cipləri ilə savanlara üz tutur. Əvvəllər safarinin orijinal məqsədi əsasən ov idisə, indi isə bələdçinin müşayiəti ilə savannaya dinc ekskursiyalardır. Safari həyəcanverici bir macəradır, təbiətə qərq olmaq və təbii yaşayış yerlərində aslan, bəbir, kərgədan, zebra, fil, camış və başqa bu kimi heyvanlara baxmaq üçün bir yoldur. Zürafə ilə səhər yeməyi yemək də yalnız Keniyada mümkündür desək, bəlkə də yanılmarıq. Nairobi yaxınlığında yerləşən "Giraffe Manor Boutique" otelində bunu reallaşdıra bilərsiniz. Qətiyyən narahat olmayın, zürafələr sizin yeməyinizi yeməyəcək. Artıq turistlərə öyrəşmiş zürafələri qonaq etmək üçün otelə daxil olanda sizə xüsusi yeməklər veriləcək.
