Türkiyə

Türkiyə həm coğrafi mövqeyi, həm də tarixi zənginliyi ilə dünyanın ən çox ziyarət edilən ölkələrindən biridir. Üç qitənin qovşağında yerləşən bu ölkə həm Asiyanın, həm də Avropanın xüsusiyyətlərini özündə birləşdirir. Hər bir bölgəsində fərqli iqlim, təbiət və mədəniyyətin yaşandığı Türkiyə səyahətçilərə olduqca geniş imkanlar təqdim edir. İstər ailəvi istirahət, istər romantik səyahət, istərsə də fərdi kəşflər üçün uyğun şərait burada mövcuddur.
İstanbul həm Osmanlı dövrünün tarixi mirasını, həm də müasir şəhər həyatını bir arada təqdim edir. Aya Sofiya, Topkapı Sarayı, Sultanahmet məscidi, Qalata qülləsi və Bosfor boğazı kimi tarixi və coğrafi məkanlar turistlərin ən çox maraq göstərdiyi yerlərdir. Hər kəsin ziyarət etmək istədiyi bu şəhər, tarix və mədəniyyət həvəskarlarının ilk dayanacağıdır.
Egey və Qara dəniz sahilləri, Pamukkale, Efes antik şəhəri, Troy, Mardin, Şanlıurfa və Nemrut dağı kimi bölgələr də müxtəlif maraq dairələrinə cavab verir. Kimisi qədim sivilizasiyaların izlərini izləmək, kimisi isə təbiətin yaratdığı unikal strukturları görmək üçün bu bölgələrə üz tutur.
Bu qədər geniş və zəngin bir ölkəni təkcə bir səfərlə kəşf etmək çətin olsa da, TURLAR.AZ saytında təqdim olunan müxtəlif paketlər və növləri bu prosesi daha asan və sistemli şəkildə reallaşdırmağa kömək edir. Bu yazıda Türkiyə turlarının növləri, qiymətləri, şəhərlər üzrə istiqamətlər və saytın təqdim etdiyi imkanlar haqqında ətraflı məlumat verəcəyik.

Türkiyə turlarının növləri

Türkiyə turizmi təkcə yay aylarında dəniz və günəşlə məhdudlaşmır. Bu ölkə ilboyu fərqli zövqlərə və maraqlara uyğun müxtəlif paketləri ilə zəngindir. İstirahət, mədəniyyət, dəniz çimərlikləri və qış idmanları kimi fərqli istiqamətlərdə təqdim olunan səfərlər hər yaş və tələblərə cavab verir. Saytımızda bu istiqamətlərin hər biri üçün uyğun qiymətə və xidmət tərkibli paketlər seçmək mümkündür. Hansı mövsüm olursa olsun. Türkiyə ilə istədiyiniz tətili planlamaq və reallaşdırmaq mümkündür.

İstirahət mərkəzləri

Türkiyənin sahil bölgələri xüsusilə yay aylarında ən çox seçilən istiqamətlərdəndir. Antalya, Alanya, Marmaris və Fethiye kimi bölgələrdə rahat otellər, all-inclusive xidmətlər və möhtəşəm təbiət sizi gözləyir. Ailəvi istirahət üçün nəzərdə tutulan bu səfərlər sakitlik, komfort və lüksü bir araya gətirir. Bu növ gəzintilər zamanı dəniz kənarında yerləşən beşulduzlu otellərdə qonaqlama, zəngin bufet menyuları, animasiya proqramları və spa xidmətləri təqdim olunur. Yay tətilini stresssiz və rahat keçirmək istəyənlər üçün istirahət mərkəzləri mükəmməl seçimdir. Üstəlik, bu bölgələrdə mövsümə uyğun festival və tədbirlər də təcrübənizi daha da maraqlı edir.

Mədəniyyət və tarix

Tarix sevərlərin zövqünü oxşayacaq seçimlər mövcuddur. İstanbulun hər daşında tarix yatır. Aya Sofiya, Topkapı Sarayı, Sultanahmet məscidi kimi abidələr mədəniyyət aşiqi səyahətçiləri valeh edir. Bu növ turlar zamanı turistlər təkcə İstanbul deyil, Konya , Bursa, Ankara, Şanlıurfa, Mardin kimi tarixi şəhərləri də ziyarət edə bilərlər. Qədim dövrlərdən qalan abidələri canlı şəkildə görmək, muzeyləri gəzmək və yerli bələdçilərin danışdığı hekayələrlə zənginləşmək bu səyahətin əsas üstünlüklərindəndir. Bu marşrutlar mədəniyyət turizmi ilə məşğul olan tələbələr, müəllimlər və araşdırmaçılar üçün də uyğundur.

Dəniz və çimərlik

Əgər dəniz və günəş arzulayırsınızsa, Bodrum, Kuşadası və Çeşmə sizi çağırır. Təmiz çimərliklər, mavi bayraqlı sahillər və sakit atmosfer yay üçün seçimlərdir. Bunlar sahil boyunca yerləşən komfortlu otellərdə gecələmə, dəniz mənzərəli otaqlarda qalma və gün boyunca günəş vannası alma imkanı təqdim edir. Aktiv turistlər üçün isə su idmanı növləri, skuter, banana, parasailing və dəniz dalğıc fəaliyyətləri də mövcuddur. Axşamlar isə liman kənarındakı restoranlar və canlı musiqi məkanları istirahətinizi daha da yadda qalan edəcək. Gənclər, ailələr və cütlüklər üçün dəniz turları həm sərfəli, həm də keyfiyyətli seçimlərdən biridir.

Qış və xizək

Türkiyə yalnız yayda deyil, qış aylarında da fərqli imkanlar təklif edir. Uludağ və Palandöken xizək mərkəzləri həm peşəkar, həm də həvəskar xizəkçilər üçün əla imkanlardır. Qış idman növləri ilə maraqlananlar üçün bu bölgələrdə yüksək keyfiyyətli xizək trasları, avadanlıq icarəsi, xizək müəllimləri və isti içkilərlə dolu dağ otelləri təqdim olunur. Uludağda gün ərzində xizək sürmək, axşam isə odun sobası olan dağ evi atmosferində istirahət etmək bənzərsiz bir təcrübə yaradır. Palandöken isə hündürlüyü və qar örtüyünün qalınlığı baxımından peşəkar yarışlara da ev sahibliyi edir. Ailəvi və dostlarla birlikdə unudulmaz qış tətili planlayanlar üçün bu seçimlər mükəmməl uyğun gəlir.

Ən çox seçilən Türkiyə şəhərləri

Türkiyə həm təbii gözəllikləri, həm tarixi zənginlikləri, həm də müasir turizm infrastrukturu ilə dünyanın ən çox ziyarət olunan ölkələrindən biridir. Xüsusilə azərbaycanlı turistlərin ilboyu üz tutduğu bir çox məşhur şəhərləri vardır. Onlar həm yay istirahəti, həm də mədəni səfərlər üçün uyğun seçimlərdir. Bu şəhərlər təkcə maraqlı ekskursiyalarla deyil, eyni zamanda fərqli həyat tərzini yaşamaq üçün təqdim etdiyi imkanlarla da fərqlənir. Bu şəhərlərə aid müxtəlif qiymət aralığında, fərqli xidmət tərkibli tur paketləri mövcuddur. Ailəvi, fərdi, romantik və ya dostlarla birlikdə səyahət etməyi düşünən hər kəs öz istəyinə uyğun şəhəri seçə bilər. İstanbuldan Kapadokyaya, Antalyadan Bodrum və Kuşadasına qədər olan marşrutlar hər kəsin zövqünü oxşayacaq səviyyədə zənginliklər təqdim edir.

İstanbul

İstanbul minillik tarixin və müasir həyatın birləşdiyi şəhərdir. Boğaz gəzintisi, tarixi abidələr və alış-veriş fürsətləri ilə dolu bir şəhərdir. Bu şəhər həm Osmanlı, həm də Bizans izlərini daşıyan muzeyləri, sarayları və məscidləri ilə mədəniyyət həvəskarlarını valeh edir. Müasir restoranları, ticarət mərkəzləri və dəniz mənzərəli kafeləri ilə gənclər və işgüzar səfərdə olanlar üçün də əlverişli məkandır. İstanbulun Beşiktaş, Kadıköy, Taksim kimi mərkəzi bölgələri turistlər üçün maraqlı təcrübələrlə doludur. Boğazda qayıqla gəzinti etmək, Aya Sofiyanı və Topkapı Sarayını ziyarət etmək, Böyük Bazarda alış-veriş etmək hər səyyahın planına düşəcək fəaliyyətlərdəndir.

Antalya

Günəş, dəniz və xidmət deyəndə ağıla gələn ilk şəhərlərdən biri. Antalya otelləri lüks səviyyəli xidmətləri ilə seçilir. Ailəvi istirahət üçün də mükəmməldir. Akdeniz sahilində yerləşən bu şəhər, yay aylarında milyonlarla turistin seçimidir. Belek, Kemer, Lara və Side kimi bölgələr yüksək səviyyəli "all inclusive" otelləri, təmiz çimərlikləri və ailəyə uyğun əyləncə parkları ilə tanınır. Həmçinin Antalyada tarixi yerləri sevənlər üçün qədim Roma teatrı Aspendos, antik şəhər Perge və Düden şəlaləsi kimi görməli məkanlar da mövcuddur. Çimərliklərlə yanaşı, gecə həyatı, akvaparklar və uşaq klubları da buranı daha da cazibədar edir.

Kapadokya

Kapadokyada isti hava şarları ilə səmada gəzmək və yeraltı şəhərləri kəşf etmək çox fərqli təcrübədir. Bu səfər daha çox romantik və fərdi səyahətçilər üçün idealdır. Unikal təbiət formasiyaları, qayalıqlar, "peri bacaları" və lavaların yaratdığı coğrafiya Kapadokyanı fərqli edən əsas cəhətlərdəndir. Burada gün doğumunu hava şarında qarşılayan cütlüklər üçün bu anlar unudulmaz olur. Kapadokya özünəməxsus mağara otelləri, daş memarlığı və yerli şərabları ilə də tanınır. Tarix və təbiəti bir arada yaşamaq istəyənlər üçün Göreme Açıq Hava Muzeyi, Kaymaklı və Derinkuyu yeraltı şəhərləri kimi möhtəşəm məkanlar mövcuddur. Üstəlik bölgədəki turizm agentlikləri vasitəsilə at belində gəzintilər, yürüş marşrutları və foto turları təşkil olunur. Bu da səyahəti daha da zəngin edir.

Bodrum və Kuşadası

Gənclər və əyləncə sevənlər üçün ən uyğun şəhərlər arasında yer alan Bodrum və Kuşadası həm çimərlik, həm də gecə həyatı baxımından seçilir. Bodrum, Egey dənizinin parlayan ulduzu olaraq, klubları, restoranları və marinaları ilə lüks həyat tərzini sevənlər üçün məkandır. Burada gündüz dəniz və günəşin dadını çıxaran turistlər axşamlar rəngarəng və enerjili gecə həyatına qoşulurlar. Bodrum qalası, Antik Teatr və yerli bazarlar şəhərin mədəni tərəfini də tamamlayır. Kuşadası isə daha çox ailələr və Avropa turistləri üçün sevilən sahil şəhəridir. Burada yerləşən "Aqua Fantasy", "Adaland" kimi akvaparklar uşaqlı ailələrin diqqətini çəkir. Kuşadası həm də Efes antik şəhərinə yaxınlığı ilə tarix həvəskarlarının diqqətini çəkir. Kruiz gəmilərinin dayanacaq nöqtəsi olması da bu şəhərə beynəlxalq turist axınını artırır. Bu şəhərlərdə təklif olunan turlar təkcə çimərliklərdən ibarət deyil, həm də ekskursiya, su idmanı və təbiət marşrutları ilə zəngindir.

Türkiyə turlarında qiyməti

Türkiyəyə səfər planlayarkən ən önəmli məsələlərdən biri də tur paketlərinin qiymət formalaşmasıdır. Qiymətlərə təsir edən amillər bir neçə əsas kateqoriyada toplanır. Mövsüm, otel səviyyəsi, daxil olan xidmətlər və yerləşmə bölgəsi. TURLAR.AZ-da bu faktorlar nəzərə alınaraq müxtəlif büdcələrə uyğun təkliflər hazırlanır. Eyni marşrut üzrə fərqli qiymətlər görmək mümkündür. Bu fərqlilik ilk baxışdan bənzər görünən turların əslində xidmət və səviyyə baxımından fərqli olduğunu göstərir

Mövsümə görə qiymət fərqləri

Ən yüksək qiymət mövsümü yay aylarıdır. İyun-avqust arası tələb yüksək olduğundan qiymətlər bir qədər artır. Bu dövrdə istər otellər, istərsə də aviareyslər daha yüklü olur və erkən rezervasiya etməyənlər üçün qiymətlər xeyli yüksəlir. Hətta eyni oteldə yerləşmə, yayda bahar aylarına nisbətən ikiqat baha başa gələ bilər. Əksinə, qış və bahar aylarında isə daha sərfəli tur paketləri təklif olunur. Bahar ayları, mart və aprel həm hava baxımından rahat, həm də qiymət baxımından sərfəlidir. Noyabr-fevral arası isə bəzi bölgələrdə mövsüm xaricidir. Bu zaman təklif olunan qiymətlər minimum səviyyəyə enir. Məktəb tətili, bayram günləri və həftəsonları da qiymətlərə əlavə təsir göstərir.

Otel seçimi və xidmət səviyyəsi

3 ulduzlu otellərdən 5 ulduzlu lüks komplekslərə qədər geniş seçim imkanı mövcuddur. Xidmət səviyyəsi və daxili imkanlar qiymətə ciddi təsir edir. Lüks otellər çox zaman "all inclusive" və ya "ultra all inclusive" sistemini təqdim edir. Bu da yeməklər, içkilər, əyləncə və bəzi hallarda spa xidmətlərini əhatə edir. Bu səbəbdən qiymətlər daha yüksək olur. Orta səviyyəli otellər və ya butik otellər sadə rahatlıq təklif edir və qiymətləri daha münasib olur. Otelin dənizə məsafəsi, yerləşdiyi bölgə və verdiyi əlavə uşaq klubu, akvapark, animasiya proqramları və transfer qiymətin formalaşmasına təsir göstərən faktorlardandır.

Daxil olan xidmətlər

Qiymətlərə daxil olan xidmətlərə diqqət yetirmək vacibdir. Aviareys, transfer, qidalanma və ekskursiyalar qiymətə təsir edən amillərdəndir. Bəzi turlar yalnız otel və transfer xidmətini əhatə edir. Digərləri isə tam paket kimi təqdim olunur və buna görə də qiymət daha yüksək olur. Məsələn, bəzən bir turda səhər yeməyi daxil olduğu halda, digər turda həm səhər, həm də nahar və şam yeməkləri təqdim edilir. Şəhərdaxili və ya ətraf bölgələrə ekskursiyalar, hava limanı transferləri, rəhbər xidməti və sığorta daxil olduğu halda qiymət avtomatik artır. Əgər sərfəli qiymət axtarırsınızsa, bu xidmətlərin hansılarının qiymətə daxil olduğunu dəqiq öyrənmək faydalı olacaq.