Azərbaycanda qoruqlara giriş məhdudiyyəti aradan qaldırıldı
Bu gündən Dövlət Turizm Agentliyinin tabeliyində olan turizm nümayiş obyektləri, məbəd və muzeylərə tətbiq olunmuş giriş məhdudiyyəti aradan qaldırılıb.
Bu barədə "Report"a Agentlikdən məlumat verilib.
Məlumata görə, bu barədə qərar Nazirlər Kabineti yanında Operativ Qərargahının 18 may 2020-ci il saat 00:00-dan etibarən ölkə ərazisində xüsusi karantin rejimi ilə əlaqədar tətbiq edilən bəzi məhdudiyyətlərin aradan qaldırılması barədə qərarı rəhbər tutularaq qəbul edilib.
Müəssisələrin fəaliyyəti, həmçinin TƏBİB tərəfindən hazırlanmış "Turizm və hotelçilik sektorunda koronavirus (COVID-19) infeksiyasının profilaktikasına dair metodiki göstərişlər"in tələbləri nəzərə alınmaqla davam etdiriləcək.
Artıq ziyarətçilər aşağıda adları qeyd olunan turizm müəssisələrini sosial məsafə və sanitar-epidemioloji qaydalara əməl etmək şərtilə ziyarət edə bilərlər:
"Atəşgah məbədi" Dövlət Tarix-Memarlıq Qoruğu;
"Yanar dağ" Dövlət Tarix-Mədəniyyət və Təbiət Qoruğu;
"Yuxarı Baş" Dövlət Tarix-Memarlıq Qoruğu: Şəki Xan Sarayı, Şəkixanovların ev muzeyi, Şəki Diyarşünaslıq Muzeyi, Şəki Xalq Tətbiqi Sənət Muzeyi və Şəki Rəsm Qalereyası;
"Kiş" Tarix-Memarlıq Qoruğu: Alban Məbədi.
Agentliyin tabeliyindəki bütün turizm müəssələrində karantin rejimi ilə bağlı sosial izolyasiya və profilaktik tədbirlərə dair qaydaları pozan ziyarətçilər barəsində qanunvericiliyə uyğun qaydada tədbirlər görüləcək.
Xatırladaq ki, 14 mart 2020-ci il saat 00:00-dan etibarən ölkə ərazisində bəzi sosial izolyasiya tədbirlərinin təqbiqi qərarı rəhbər tutularaq turizm nümayiş obyektləri, məbəd və muzeylərə girişə məhdudiyyət qoyulmuşdu. /report.az
