Bakı hava limanı Yunanıstanın "Aegean Airlines" aviaşirkətinin ilk reysini qarşılayıb - FOTO
Bakı hava limanı Yunanıstanın "Aegean Airlines" aviaşirkətinin ilk reysini qarşılayıb - FOTO
Sentyabrın 30-dan etibarən "Aegean Airlines" Afinadan Heydər Əliyev Beynəlxalq Aeroportuna müntəzəm reyslər həyata keçirməyə başlayıb.
Bu barədə "Azərbaycan Hava Yolları" QSC-nin Mətbuat Xidməti məlumat yayıb.
Qeyd olunub ki, Yunanıstan aviadaşıyıcısının təyyarəsi ənənəvi olaraq su tağı ilə qarşılanıb.
"Heydər Əliyev Beynəlxalq Aeroportu bütün səyahətçilər üçün yüksəkkeyfiyyətli xidmət, komfortlu şərait yaratmağa çalışır və daha çox aviaşirkətin cəlb edilməsi inkişaf strategiyamızın mühüm hissəsidir. Əminik ki, Yunanıstan aviadaşıyıcısı ilə əməkdaşlığımız uğurlu və sərnişinlərimiz üçün perspektivli olacaq", - deyə hava limanının direktoru Teymur Həsənov bildirib.
Şirkətin məlumatında deyilir ki, Afina ilə Bakı arasında reyslər həftədə iki dəfə, çərşənbə axşamı və şənbə günləri yerinə yetiriləcək. Bu uçuşların gecə saatlarında həyata keçirilməsi sərnişinlərə daha rahat vaxt intervalları ilə aviadaşıyıcının geniş marşrut şəbəkəsindən seçim imkanı verir.
Qeyd olunub ki, "Aegean Airlines" sərnişinlərə Kipr, Balkan və Qərbi Avropa ölkələri, həmçinin Krit, Santorini, Mikonos və digər məşhur yunan adaları daxil olmaqla 80-dən çox istiqamətdə uçuşlar təklif edir.
Aviadaşıyıcının rəsmi www.aegeanair.com internet saytında, həmçinin aviaşirkətin satış ofislərində ətraflı cədvəllə tanış olmaq və aviabiletləri bron etmək mümkündür.
/ oxu.az
