Turizm şirkətləri AZAL-ın biletləri yalnız onlayn satmasından narazıdır
Azərbaycan Turizm Agentlikləri Assosiasiyasının (ATAA) təşəbbüsü ilə "Azərbaycan Hava Yolları" QSC (AZAL) ilə onlayn görüş keçirilib.
Bu barədə "Report"a Assosiasiyadan bildirilib.
Məlumata görə, görüşdə ikitərəfli əlaqələrin və əməkdaşlığın genişləndirilməsi, uçuşların bərpası, sərnişinlərin təhlükəsizliyi, eləcə də bilet satışı ilə məşğul olan turizm şirkətlərinin fəaliyyəti ətrafında fikir mübadiləsi aparılıb.
Müzakirələrdə çıxış edən ATAA-nın İdarə Heyətinin sədri Rüfət Hacıyev hazırda turizim şirkətlərinin böhran yaşadığını, koronavirus (COVID-19) pandemiyası ilə əlaqədar olaraq böyük maliyyə itkiləri ilə üzləşdiklərini diqqətə çatdırıb. O, iyunun 18-dən AZAL-ın bilet satışını yalnız onlayn qaydada həyata keçirməsini əksər turizm şirkətlərinin müəyyən narazılıqla qarşıladığını da bildirib.
Məhdudiyyətlərin pandemiya dövründə tətbiq olunmasının vacibliyinə toxunan AZAL-ın vitse-prezidenti Eldar Hacıyev yeni qaydaların tətbiqində əsas məqsədin vətəndaşların sağlamlığını qorumaq və sosial məsafəni saxlamaqla virusun geniş yayılması riskinin qarşısının alınması olduğunu bildirib. O, karantin bitdikdən sonra bilet satışlarının sərnişinlərin istəyinə uyğun olaraq həm kassalara yaxınlaşmaqla, həm də onlayn şəkildə mümkün olacağını qeyd edib, eyni zamanda turizm şirkətlərinin karantindən sonra öz müştərilərinə bilet satışını əvvəlki qaydada həyata keçirə biləcəyini də vurğulayıb.
E.Hacıyev hazırda həyata keçirilən xüsusi reyslərin pilot layihə olduğunu və nəticələrdən asılı olaraq digər istigamətlərə də uçuşların açılmasını nəzərdən keçirdiklərini deyib.
Müzakirələr çərçivəsində R.Hacıyev iş yerlərində virusa yoluxma risklərini azaltmaq məqsədi ilə ATAA tərəfindən turizm şirkətləri üçün yeni standartlar təklifinin hazırlandığını da diqqətə çatdırıb.
Onlayn müzakirələrin sonunda ikitərəfli görüşlərin mütəmadi olaraq keçirilməsi, AZAL və ATAA üzvləri arasında pandemiya və post-pandemiya dövründə kommunikasiya əlaqələrinin daha da genişləndirilməsi qərara alınıb. /report.az
