Türkiyədə lokdaun turistlərə şamil edilməyəcək
Türkiyədə aprelin 29-dan etibarən tətbiq ediləcək sərt karantin rejimi zamanı çölə çıxma məhdudiyyətləri əcnəbi turistlərə şamil olunmayacaq. Bu barədə ölkənin Daxili İşlər Nazirliyinin məlumatında deyilir.
Xatırladaq ki, daha əvvəl Türkiyə Prezidenti Rəcəb Tayyib Ərdoğan koronavirusla bağlı vəziyyətlə əlaqədar 29 aprel saat 19:00-dan 17 may saat 05:00-a qədər ölkədə tam lokdaun olacağını elan edib. DİN-in istisna kimi fərqləndirdiyi yerlərdən başqa, bütün təşkilatlar və qurumlar fəaliyyətlərini dayandıracaq. Şəhərlərarası səyahətə yalnız səlahiyyətlilərdən icazə alındıqdan sonra icazə veriləcək.
"Ölkəmizdə müvəqqəti turizm fəaliyyəti çərçivəsində olan əcnəbilərə komendant saatı məhdudiyyətlərindən azad olma haqqı verilir. Yaşayış icazəsi olan əcnəbilərə isə komendant saatı tətbiq ediləcək", - sənəddə deyilir.
