Vüqar Bayramov: "Turistlər rayonları deyil, Bakını seçirlər

Vüqar Bayramov: "Turistlər rayonları deyil, Bakını seçirlər"
"Azərbaycana gələn turistlərin əksəriyyəti yalnız Bakıda qalmağa üstünlük verir".
Bunu deputat Vüqar Bayramov sosial şəbəkə hesabında ölkəyə gələn turist sayı ilə bağlı etdiyi paylaşımda bildirib.
"Bu ilin birinci yarısında turistlərin 84,2 faizi Bakıda, dörd faizi Qusarda, 3,6 faizi Naftalanda, 3,4 faizi Qəbələdə, iki faizi Qubada, 0,4 faizi Gəncədə, 2,4 faizi isə digər şəhər və rayonlardakı hotellərdə gecələyib.
Bütövlükdə isə ölkə üzrə hotellərdə gecələmələrin ümumi sayı 32,7 faiz artaraq 1 milyon 363 minə çatıb. Turistlər üzrə isə gecələmələrin sayı 56,5 faiz artaraq 788,1 min olub".
Deputat bölgələrin xarici turist cəlb etməkdə paytaxt hotellərinə uduzduğunu qeyd edib:
"Paytaxtın infrastrukturunu nəzərə aldıqda bu, normal qarşılana bilsə də, regional gecələmə sayında fərqin böyük olması diqqətdən kənarda qalmamalıdır.
Təəssüf ki, hələ də bölgələr turizm potensialını tam təqdim edə bilmirlər və bu da xarici turist cəlbində çətinlik yaradır. Digər tərəfdən, əksər rayonlarda turizm  xidmətlərinin qiyməti yüksək olaraq qalmaqdadır. Keyfiyyət isə hələ də standartlardan geri qalır.
Nəticədə, bölgələrimizin böyük turizm potensialından tam istifadə olunmur. Bu isə o deməkdir ki, bölgələrin turizm imkanlarının reinteqrasiyası üçün işlər sürətləndirilməlidir. Bölgələrdə turizm sektoruna daha çox sərmayənin cəlb edilməsi və rəqabətin gücləndirilməsi əsas hədəflərdən olmalıdır. Turizmin enerjidən sonra ölkəyə ən çox valyuta gətirən sektor olduğunu nəzərə alsaq, o zaman bu sahənin bölgələrin inkişafına, rayonlarda yeni iş yerlərinin yaradılmasına verəcəyi töhfəni təsəvvür etmək çətin olmaz". / oxu.az