Azərbaycan vətəndaşlarının Gürcüstana səfərləri 11% azalıb
Bu ilin I rübündə Azərbaycandan Gürcüstana 197,2 min nəfər ziyarətçi səfər edib.
"Report"un yerli bürosu xəbər verir ki, bu barədə Gürcüstanın Milli Statistika İdarəsinin hesabatında bildirilib.
İllik müqayisədə ziyarətçilərin sayı 7,3% azalıb. Azərbaycandan gələn ziyarətçilər qonşu ölkəyə səfər edənlərin 22,3%-ni təşkil edib. Bu göstərici ilə Azərbaycan Gürcüstanın yanvar-mart aylarında qəbul etdiyi əcnəbi ziyarətçilərin sayı baxımından birinci yeri tutub.
Hesabat dövründə Azərbaycan vətəndaşlarının Gürcüstana etdiyi səfərlərin sayı isə 262,2 min təşkil edib. Bu göstərici ötən ilin eyni göstəricisindən 10,5% azdır.
Yanvar-martda qonşu ölkənin qəbul etdiyi beynəlxalq ziyarətçilərin sayı 17,6% azalaraq 1,3 milyon nəfərə bərabər olub. /report.az
