İrana səyahət haqqında bilməli olduqlarınız

İranda gedəndə haqqında bilməli olduğunuz şeylər:
Dil
Azərbaycan şəhərlərinə getsəniz, heç bir dil proleminiz olmayacaq, amma farsların yaşadığı şəhərlərə getsəniz fars dilində vacib sözləri bilməyiniz çox yaxşı olar. İngiliscə ilə də vəziyyəti idarə edə bilərsiniz, çünki böyük şəhərlərdə əksər taksi şoferləri və satıcılar ingiliscə başa düşür və danışırlar.

Kandovan
Təbrizin yaxınlığnda yerləşən Kəndovan kəndi. Üzərinə "Azarbayjan" yazılmış motosikl. İnsanlar öz milli kimliklərini və dillərini belə kiçik detallarla ifadə etməyə çalışırlar.

Pul:
İrana getmək üçün elə də çox pula ehtiyacınız yoxdur. Üstəlik Azərbaycan vətəndaşları üçün vizaya da ehtiyac yoxdur, bu da adamın işini xeyli asanlaşdırır. İranda pul vahidi rialdır, amma hesabı rialla edəndə çaşa bilərsiniz, elə Iranlılar özləri də rial yox tümənlə hesablayırlar. Çətin heç nə yoxdur, o uzun-uzun sıfırlardan birini silirsiniz, vəssalam. Məsələn, 10 000 rial əvəzinə 1000 tümən desəniz işiniz xeyli asanlaşar. Gedərkən, manat yox dollar götürməyiniz daha məsləhətlidir, dollar manatdan daha bahadır və hər gün daha da bahalaşır.
Əlavə şeylərə pul xərcləməyib, planlı davransanız sizə 10 günlük İran səyahəti üçün -hər şey daxil – 300-350 dollar kifayət edər.

Transport:

İranda yollar çox təmiz, avtobuslar isə, istər şəhərlərdə, istərsə də şəhərlərarası, olduqca rahatdır. Avtobusda qadınlar və kişilər ayrı oturur. Qadınlar arxa qapıdan, kişilər isə qabaq qapıdan minməlidirlər. Avtobusda qadınlarla kişiləri ayıran yerin ortasında hasar kimi bir şey var, qadınlar tərəfə yalnız "konduktor" keçə bilər. Bu qayda şəhərlərarası avtobuslara aid deyil, o avtobuslar elə bizdə olduğu kimidir. Amma bilet alanda qadınlarla kişiləri ayrı oturacaqlara salmağa çalışırlar, təbii ki, bu ər-arvad və qohum olanlara aid deyil.

Təbrizdə avtovağzal. Təbrizlilər bura "Üst Terminal" deyirlər.

Geyim

İranda kişilər üçün heç bir geyim qadağası yoxdur, amma mən orada cins şalvarlı, yaxud döyməli, sırğalı adam görmədim, hətta turistlər də yerlilərə uyğun geyinməyə çalışırdılar, özünüsenzura o saat bilinirdi. Qadınlara gəldikdə isə başdan ayağa qaraya bürünməyə ehtiyac yoxdur, bir şərf və bir az uzun – şalvarın üstünü örtən qollu kofta kifayətdir. Mən İranda aşağıdakı fotolarda gördüyünüz kimi gəzmişəm, bu normal geyim hesab olunur.

Otel

İranda otellər elə də baha deyil. Bakıdan fərqli olaraq istənilən qədər çox ucuz mehmanxanalar tapa bilərsiniz. Yəni əvvəlcədən aylarla axtarış etməyə ehtiyac yoxdur. Gedib mərkəzi küçələrin birində düşsəniz hər addımdan bir mehmanxana görəcəksiniz. Bizim pulla 10 manata normal mehmanxanalar tapa bilərsiniz, 20- 35 manat arası pulla da İran üçün yaxşı hesab olunan otellərdə qala bilərsiniz. Təbii ki, çox gözəl və çox bahalı otellər də var, pulunuza minnət.

Iran-hotel
Təbriz, Məşhəd otel. Bu otağın qiyməti bir gecə üçün təxminən 10 manatdır.
Yemək:

İran yeməkləri bizdəkindən elə də fərqli deyil, yəni heç qəribçilik çəkməyəcəksiniz. Bütün kababların yanında düyü verirlər. Sulu yeməkləri elə də çox deyil, restoranlarda təklif olunan yeməklərin əksəriyyəti quru yeməklərdir. Amma sulu yeməkləri də yox deyil, dadlı şorbaları var. Təbrizdə arpa və yaşıl mərcidən hazırlanmış dadlı şorbaları yeyib bitirəndən sonra yadımıza düşdü ki, bunların şəklini də çəkmək olardı.
Küçədə təbii meyvə suları satılır. Gözünüzün qarşısında istədiyiniz meyvəni çəkib verirlər, qiyməti də çox münasibdir. İranda fast food tapmaq bizdəki kimi rahat deyil, məsələn bizdə dönər, şaurma və s. var. Orada isə küçədə külçələr, şirniyyatlar daha çox satılır. Çay, ayran və meyvə suyunu çox içirlər. Kola və alkoholsuz pivə də çox içilənlərdəndir.

İranda səyahət etdiyimiz yerlər:

Biz rəfiqəmlə birlikdə mayın 2-dən 11-ə qədər İranda olduq. İranda Təbriz, Şiraz, Rəşt və Ərdəbil şəhərlərinə getdik. Əvvəlcə yalnız Təbriz və Ərdəbilə getməyi düşünsək də sonradan Şiraz və Rəşti də əlavə etdik. Səbəb də təbii ki, Persepolis və Rudxan qala idi. 10 gün vaxtımız və elə İran boyda da planımız vardı. 10 günün tam iki günü yollarda keçdi.

Bakı – Təbriz 12 saat

Təbriz – Şiraz 19 saat

Şiraz – Rəşt 16 saat

Rəşt – Ərdəbil 6 saat

Əlavə:

Təbriz – Kəndovan 1,30 saat (+qayıtmaq)

Şiraz – Persepolis 1 saat (+qayıtmaq)

Rəşt – Rudxan qala 2 saat (+qayıtmaq)

Source: Səmranın səyahət bloqu