Türkiyədə yeni turizm mövsümünün açılışı yubadıla bilər

Türkiyə hökuməti koronavirusla bağlı yeni turizm mövsümünü mart ayında yox, aprelin sonunda açmağı hotellərə təklif edib.
"Report" NTV-yə istinadən xəbər verir ki, bu barədə Koronavirus Elmi Komitəsinin iclasından sonra mətbuat konfransında ölkənin mədəniyyət və turizm naziri Mehmet Nuri Ərsoy bildirib.
"15 aprel həssas bir tarixdir. Xaricdən Türkiyəyə turist sifarişlərinin aprelin sonuna keçirilməsi məntiqli olardı. Nazirliyimizə bağlı qurumların tədbir və mərasimlərinin apreldən sonra keçirilməsi məsələsi gündəmdədir. Hotellər mövsüm açılışını martın yox, aprelin sonuna keçirməlidir".
Bununla yanaşı, ölkənin səhiyyə naziri Fəxrəddin Qoca da ölkədə koronavirusa bir neçə yoluxma halının hələ epidemiya demək olmadığını, məktəbləri bağlamaq məsələsinin hələlik müzakirə olunmadığını bildirərək zərurət olmadan xaricə səyahətə getməyin məsləhət görülmədiyini diqqətə çatdırıb. Nazirin sözlərinə görə, yay dövründə virusun təsirinin azalacağı gözlənilir. /report.az