Qəbələ otellərində "bayramdır" - 2 AYDA 10 MİN TURİST GƏLİB
Bu ilin yanvar-fevral aylarında Qəbələ rayonundakı otel və mehmanxana tipli müəssisələrə 10 min 59 nəfər yerli və əcnəbi turist yerləşdirilib. Onların 5 min 928 nəfəri və ya 58,9 faizi Azərbaycan, 4 min 131 min nəfəri və ya 41,1 faizi xarici ölkə vətəndaşı olub.
Şuşaya turist səfərləri təşkil edilir - Səfər proqramı və qiymətlər - SİYAHI
FED.az xəbər verir ki, bu barədə Qəbələ Rayon Statistika İdarəsindən məlumat verilib.
Bildirilib ki, yanvar-fevral aylarında Qəbələnin otel və mehmanxana tipli müəssisələrinə yerləşdirilən yerli və əcnəbi turistlərin sayı ötən ilin eyni dövrü ilə müqayisədə 659 nəfər və ya 6,1 faiz azalıb. İki ayda yerli turistlərin sayı keçən ilin müvafiq dövrü ilə müqayisədə 1482 nəfər və ya 20 faiz azalsa da, əcnəbi turistlərin sayında 823 nəfər və ya 24,9 faiz artım qeydə alınıb.
İdarədən verilən məlumata görə, yanvar-fevral aylarında Qəbələyə gələn əcnəbi turistlər arasında Birləşmiş Ərəb Əmirliklərinin vətəndaşları üstünlük təşkil edib. Belə ki, iki ayda bu ölkənin 904 vətəndaşı Qəbələdə olub. Bundan əlavə, həmin müddətdə Qəbələyə Səudiyyə Ərəbistanı, Hindistan, Küveyt, Rusiya, Qətər, Oman, Pakistan, Türkiyə, Qazaxıstan və digər ölkələrdən də xeyli sayda turist gəlib.
İki ayda rayon ərazisində yerləşən 18 mehmanxana və mehmanxana tipli müəssisədən 15-i fəaliyyət göstərib. Müddət ərzində otel və mehmanxanalarda 4200 çarpayı-yerdən istifadə olunub. Bir gün qalmaq üçün orta qiymət 85,3 manat təşkil edib. Turistlərin qalma müddəti 1-2 gün olub. (Azərtac)
