"Şahdağ"da yay mövsümünə start verilir
"Şahdağ"da yay mövsümünə start verilir
İyunun 29-da "Şahdağ Turizm Mərkəzi"ndə yay mövsümünün başlanması ilə əlaqədar olaraq kütləvi informasiya vasitələrinin nümayəndələri üçün iki günlük mediatur təşkil edilib.
Mediaturun məqsədi "Şahdağ Turizm Mərkəzi"nin yay turizminin inkişafı istiqamətində həyata keçirdiyi işlər, turistlərə göstəriləcək xidmətlər, eləcə də təqdim olunacaq turizm məhsulları və əyləncələr haqqında ictimaiyyəti məlumatlandırmaqdır.
Mediatur çərçivəsində KİV nümayəndələri üçün turizm mərkəzinin fəaliyyəti və potensialı ilə bağlı təqdimat keçirilib. Təqdimatda çıxış edən Mərkəzin sədri Rüstəm Nəcəfov media nümayəndələrinə kompleksdə aparılan yenidənqurma və infrastruktur işləri, mərkəz ərazisində yerləşən hotellər və digər turizm obyektlərinin fəaliyyəti, qonaqlara təklif olunan yay əyləncə növləri, tədbirlər, gələcək planlar haqqında ətraflı məlumat verib.
Sədr hazırda qarşıya qoyulan əsas hədəfin mərkəzin təkcə qış turizmi baxımından deyil, ilin bütün fəsillərində fəaliyyət göstərən turizm mərkəzi kimi tanıdılması, eləcə də yerli və əcnəbi ziyarətçilərin sayının artırılması, müştəri məmnunluğunun yüksəldilməsi, həmçinin ölkədaxili və xarici tanıtım kampaniyalarının aparılması olduğunu diqqətə çatdırıb.
Rüstəm Nəcəfov "Şahdağ"ın ölkə xaricində geniş tanıtımı üçün bir sıra beynəlxalq sərgilərdə aktiv təşviqat işlərinin aparıldığını qeyd edib.
Tədbirdə media nümayəndələrinin maraq doğuran sualları cavablandırılıb. KİV nümayəndələri turizm mərkəzində qonaqlara təklif olunan kanat yollarından, atraksionlardan və müxtəlif yay əyləncələrindən istifadə ediblər.
Məlumat üçün bildirək ki, hazırda turizm mərkəzində qonaqlar kanat yolu, böyüklər və uşaqlar üçün kvadrosikl, bobkart, batut, off-road turlar, peyntbol, oxatma, paraplan, ziplayn, seqvey, "shahdag coaster", atla gəzinti, velosiped əyləncələrindən istifadə edə bilərlər. Bu il mərkəz ərazisində olan göl də istifadəyə verilib. Burada qonaqlar həm üzə, həm də su əyləncələrindən istifadə edə bilərlər.
Qeyd edək ki, 2022-ci ilin statistik məlumatlarına əsasən "Şahdağ Turizm Mərkəzi"nə 109 minə yaxın ziyarətçi səfər edib, hotellərində 60 minə yaxın şəxs qonaqlayıb.
İlhamə Əbülfət / oxu.az
